رحلتى للهجرة الى كندا من البداية الى النهاية .. الجزء الثالث

الجزء الثالث
يسعد صباحكم
وياااا رب التيسير للجميع
اليوم وبعد ما وصلنا من المطار للشقة رح نحاول نحكي مع شوية تفاصيل عن الأشياء اللي عملتها ولو على مراحل بدكم تتحملوا .

اليوم التاني اتصل فيني الكفيل لحتى نروح للبنك بعد ما أخذنا منهم موعد لان كل شي بنظام رحنا وخلال نصف ساعة فتحنا حسابين واحد عادي وواحد ادخار وما رضي الكفيل الا يحول كل مبلغ الكفالة لحسابي يا هيك الكفلا يا بلا طبعا البنك TD وبالنسبة لميزات الحسابين العادي لازم يكون في بشكل دائم ٤٠٠٠ دولار او اكتر

لحتى ما ندفع رسوم شهرية عليه أما الواصلين جديد فهم معفيين من هي الرسوم لستة اشهر اما حساب الادخار ممكن تحطوا اَي مبلغ فيه ولو كان المبلغ ٥٠٠٠ دولار او اكتر يطلعلك فائدة ١.٠٥٪؜ طبعا ممكن تدفعوا مشترياتكم ببطاقة البنك(الديبت كارد) من اَي حساب بدكم بس للتنبيه الدفع من حساب الادخار ينخصم دولارين على كل عملية شراء .

وكمان شغلة السحب بالبطاقة من اجهزة صراف غير تبع البنك نفسه تدفعوا دولارين عن كل عملية مو متل الخليج ولما تفتحوا الحساب تأكدوا من حد الشراء اللي موجود عالبطاقة انا حاولت ادفع مره اكتر من ١٠٠٠ دولار وما اشتغلت البطاقة استعنا بصديق ومشي الحال😂 وبعدها رحت البنك ورفعت الحد لغاية ٢٥٠٠ بالنسبة للكريديت كارد الصراحة بعد ما طلبتها لأني بعدني عّم استخدم بطاقة سامبا السعودية وهي غلط طبعا لان الافضل بأسرع وقت تعملوا كريديت بكندا

ومن الأشياء المهمة ان الزوجة كمان تفتح حساب بنكي او ممكن يكون الزوجين بنفس الحساب وفي حال وجود أولاد على وش جامعات كمان الافضل يكون عندهم حساب منشان لو حابين ياخذوا قرض للدراسة هيك خلصنا من اهم شغلة لازم تعملوها بعد ما توصلوا اما الشغلة التاني المهمة هي السيارة مع ان المواصلات متوفرة بكل مكان بس الصراحة اللي مو متوعد عليها وكان يروح البقالة جنب البيت بالسيارة متل حالتي الافضل يفكر بالموضوع من اول يوم طيب بس كيف نشتري سيارة ؟؟؟

طبعا ما في سيارة قبل التأمين يعني بدك تدور عالسيارة تأمن عليها وبعدين تشتريها والتأمين لازم يكون باسمك طيب رح تسألوني كيف امنت عالسيارة وبعد ما اخذت الرخصة هي بسيطة والأفضل برأي تستغلوا فرصة السماح بقيادة السيارة على الرخصة الدولية وهيك تشتروا سيارة وتتعودوا على الطرق والنظام وبعدها تفكروا تقدموا على الرخصة الكندية اما عن تجربتي مع السيارة

بحثت بموقع (Autotrader.ca) الخيارات كتير وطبعا الكل بينصح انك تشتري عن طريق شركة مو صاحب السيارة مباشرة لان الشركة تعطيك ضمان على السيارة وانا كنت هيك عّم فكر طبعا عجبتني سيارة ورحت شفتها وجربتها حتى كان في شاب لبناني عطاني السيارة طول النهار وبالآخر رجعتها ما عجتني كتير وللنصيب رجعت اشتريت من صاحب سيارة مباشرة طبعا لان السيارة عجبتني وفيها تأمين صيانة ١٠ سنوات او ١٠٠ الف كيلو يعني أفضل من عرض اَي شركة

كيييييف أمنتها؟؟ اتصلت على مندوب للتأمين وساعة على التلفون وأسئلة عن كل شي بيخطرلك او ما بيخطرلك وبالآخر عطاني السعر ١٢٠ دولار شهريا طبعا التأمين ضد الغير وهو الافضل برأي خبراء بالتأمين الشركة اسمها (دي جاردين)

وعلى فكرة لو جايب معك خطاب من شركة التأمين تبعك هي الشركة ممكن تعملك تخفيض عليه لغاية ٣٠% هاد عالرخصة الدولية طبعا، وتاني يوم أخذنا أوراق السيارة بعد ما جبنا ورقة من ورشة ان السيارة آمنة وصالحة للبيع (هي ١٠٠ دولار لحالها) ودخلنا مركز نقل الملكيات ١٠ دقايق كنا خالصين ما همهم الرخصة طبعا بس أخذت الموظفة جواز السفر كإثبات ولأنو مو موقع جابت قلم وقالتلي وقع الجواز ومشي الحال وهيك صار عنا سيارة الله يبارك فيكم

وهون رح خبركم شغلة انا اول ما وصلت واطلعت مع ابني بالسيارة اول يومين وشفت القوانين تبعهم صدقوني وبعد ٣٠ سنة سواقة سيارات أشي صغير واشي كبير خفت بس على مين تاني يوم وصلت ابني وخليت السيارة معي ووينك يا اوتاوا شوية تخبيص بالشوارع عن غير قصد طبعا ومشيت الامور هي عن السيارة والتأمين طبعا لسه في كتير شغلات نحكيها بس هي الأهم وبعدين ما حلو الوحد يدلقو حالو مرة وحدة لو حابين تسألوا عن شي معين انا حاضر بأمركم وعقبال ما شوفكم الجميع هون ولايصين بهيك معاملات يا رب

المرة الجاي رح نحكي عن المدارس مع ان الموضوع بسيط بس ما بعرف اذا رح اقدر اختصر فاتحملوا اذا تتحملوا ...... يتبع